Eise kuerze Vol vu Rangiroa op Fakarava war zimlech cool, well d’Sophie an de Yann hun dierfte ganz laang am Cockpit sëtzen; an Europa wier dat jo ondenkbar!
Ech mengen vun alle Plazen wou mer a Polynesien waren, huet Fakarava eis bal am beschte gefall! No Rangiroa war ech e bësse skeptesch, ob eng ganz Woch op engem Atoll net awer ze laang géif gin fir d’Kanner a mech, well hei wollt den David oft tauche goen. Mee dat war definitiv net esou!
Um Flughafen huet een eeleren, franséischen Här op eis gewaart an di éischt Impressioun vum Jacques war éierlech gesot net immens: Mumble, mumble, grumble, ech hun am Ufank guer näischt verstan an hu gemengt hie wär een ale Granzsak. Mee wann ee sech u seng schlecht Artikulatioun gewinnt hat, war hien eigentlech ganz ok an interessant, wann och speziell.
Fakarava ass deen zweetgréissten Atoll vu Polynesien an huet eng komesch rechteckeg Form. Zu Fakarava wunne mol keng 800 Leit. Touristesch ass et och hei nach net, obwuel dat am Gaangen ass sech lues ze änneren.
Et gëtt just e puer Pensiounen oder kleng Hotelen. Et gëtt eng Strooss vun 20km, déi an impeccablem Zoustand ass, sou wéi iwwerhaapt di ganz Insel (ganz anescht wéi zu Rangiroa), ee Genoss! D’Haiser sin all an der Rei, mat Beem voller Blummen am Gaart. Autoen gin et der net vill, d’Leit fuere mam Velo a ruffen ia orana a laache léif.
De Jacques huet eis fir d’éischt mat op Sight-seeing vum “Zentrum” geholl.
Ee klengen Hafen, ee Police-Büro an engem winzegen Container, eng Schoul, eng Kantinn, eng Mairie, eng Post, 2 Supermarchéën wou een neess erstaunlecherweis alles krut, 2 Kierchen, 2 centres de plongée an nach e puer Snacken a Restauranten wou een awer ni genee wosst wéini déi op wieren, well dat all Woch je nach Lust und Laune vum Besëtzer wiesselt. Du si mer bei de Relais Marama gefuer wou mer 2 Bungalowen fir 1 Woch gebucht haten. An do war et immens flott!
Eis 2 Bungalowen hun eraus op den Ozean gekuckt, Dag an Nuecht hu mer héiren d’Wellen donneren, déi sech um Riff gebrach hun. An eisem Haischen, wat ganz flott mat faarwegem Stoff un de Klapplueden dekoréiert war, war just ee Bett mat enger Moustiquaire an ee klengt Regal dran a soss näischt. Virun der Dir war eng kleng “porch” mat 2 Still. Kichen a Sanitär ware “commun”. Alles immens propper a ganz gutt an der Rei, grad sou wéi di faarweg Veloen déi eis zur Verfügung stoungen. Ausser eis waren net vill Leit do an di läscht Deeg ware mir souguer alleng.
D’Kanner hun neess voller Begeeschterung de Lego op hirer klenger Terrass ausgebreet an een Zoo an dono d’Spillplaz vun Heischent gebaut. Si hate richteg gutt Plaz fir dobaussen ze spillen, am Schied vun de Palmen a Beem. D’Wieder war herrlech, di ganz Woch.
Den David war 4mol tauchen, hei ass een absolut Taucher-Paradis!
Mir hu profitéiert fir nach e bëssen ze léiren a soss hu mer genee dat gemaach wou mer Loscht drop hate. Mir si vill mam Velo gefuer an de Jacques huet eis op eng magesch Plaasch gefouert, wou mir ganz alleng waren. Do huet et wierklech ausgesinn wéi op enger Postkaart! Den Himmel knallblo mat e puer dekorative Wollécken, d’Mier transparent, Palmen a wäisse Sand, esou reng, dass ee wéi op Watt gaangen ass!
Mir sin 3mol dohinner zréck gaangen, hun eis Hängematt opgehaangen, gepicknickt a si schnorchele gaangen, well hei goufen et och nach di schéinste Korallen déi ech bis elo gesinn hun a mir hun all Kéier vill Fësch an zolitt Haifësch gesinn. Een Dram! Nuets hate mer all d’Diren an d’Klapplueden vun eisen Haisercher grouss opstoen an di douce Loft huet een zwar net wierklech ofgekillt, mee huet awer gutt gedoen. De Stärenhimmel war gigantesch. Aaah, ech komme guer net méi eraus aus dem Schwärmen….!
De Kanner huet et wuel ganz gutt do gefall, mee si hun nierwelaanscht awer d’Deeg gezielt bis mer heem gin… An op eemol waren et just nach 9 Deeg an et war Zäit Fakarava äddi ze soen an zréck op Tahiti ze fléien. Den David an ech ware schwermüteg a sin iwwerzeecht dass mer iergendengkéier zréck kommen (wann ech och mäin Tauchschäin an der Täsch hun!).
