Mir sin erstaunlech schnell duerch all d’Kontrollen um Flughafen zu Auckland komm, trotz eise verseuchten Biergschong.
D’Kerstin, eng ganz léif Madamm vu Wilderness, dem Camper-Verleih ass eis op de Flughafe siche komm. Si war eng Däitsch a war viru 16 Joer wéinst der Léift an Neiseeland ausgewandert an huet och bal keen Däitsch méi konnt. Mat hir hu mer all Formalitéiten erleedegt, si huet eis interessant Tipps und Tricks verroden a wat eis besonnesch gutt gefall huet, war, wéi onkomplizéiert dat alles war. Keng laang “Passt-nëmmen-op-” a Verbuedslëschten, mee au contraire, si sot si wieren bei Wilderness am frousten, wann d’Leit de Camper sou richteg verdreckst géifen zréck bréngen, “so we know you had fun!”.
Mir krute vun hinnen och 3 wäertvoll Bicher mat, mat ultra Geheimtipps fir sightseeing a mat wëllen campsites. Dofir hate mer eis d’Firma Wilderness eraus gesicht, well si eeben éischter d’Philosophie vum fräien campéiren, wat z. D. an Neiseeland nach méiglech ass, ënnerstëtzen. All Campervan dee “self-contained” ass, d.h. wou all knaschtegt Waasser vu Kichen, Dusch an Toilette opgefaange gëtt, dierf op deene meeschte Plazen freedom camping maachen. An dat war 100%eg di richteg Entscheedung fir eis!
Neiseeland huet eis op den 1. Bléck richteg begeeschtert! Mir hate Chance mam Wieder, d’Leit sin onkomplizéiert, interesséiert a ganz frëndlech. An alles ass sou schéin an der Rei an iergendwéi mat Léift gemaach an ënnerhalen. Di meeschten Haiser si Bungalowen mat Wellblechdaach an zimlech groussem Gaart ronderëm, dee perfekt geméint ass a wou de Moment di herrlechste Blummen an Hecken dra bléien, schliesslech ass Fréijoer. Ronderëm d’Stroossen bléien iwwerall Gënz a wëll Lupinien an alle Faarwen, et ass ee Genoss!!
Mir hun eise Camper an Empfang geholl an ech sin am Ufank nach virsiichteg an ëmmer zevill no beim Trottoir, op der lénkser Stroossesäit, lass getuckert.
Mir hate just 4 Deeg op der Nordinsel firgesinn, éier mer mat der Fähr vu Wellington eriwwer op d’Südinsel géife fueren. Dat huet eis scho bal leed gedoen, well op der Nordinsel huet et mir virun allem, schon immens gutt gefall!
Mee no eiser éischter Nuecht, op der Plage, net wäit vun Auckland ewech, war et lo ENDLECH ENDLECH ENDLECH ENDLECH ENDLECH sou wäit: De Yann hat bal ee ganzt Joer dovu geschwat a gedreemt, endlech war säi Gebuertsdag do!!!!!
Mir si gemittlech d’Südinsel erof gecruised, mat méi oder manner laangen Deeg am Auto, mat ville phantastesche Landschaften an ëmmer schéinen a rouegen Campplazen owes. Eise Camper war wierklech gemittlech a ganz gutt equipéiert a mir hun di grouss Fräiheet no deem éischter ustrengende China immens genoss!
D’Géigend zwëschen Rotorua an Taupo ass berühmt fir hir geothermesch Aktivitéiten: Geysiren, sténkeg hot pools, a Blubber-Bulli…
Mir si bis
op Wellington gefuer ganz an de Süden vun der Nordinsel. An 3 Stonne si mer mat der Fähr op d’Südinsel gefuer. D’Mier war roueg an d’Vue wonnerschéin!
